長頸鹿：「先生，啱啱檢查完，你腳外圍呢個位好瘀，亦都好痛，好大機會骨折喇。」

Ｘ光好快返嚟，證實非移位第五腳掌骨骨折。

長頸鹿：「先生，同預計一樣，相關嘅地方有骨折。不過唔駛擔心，大部分病人唔駛打石膏，帶一個腳托，大概六星期就會好。」

病人：「哦，咁你轉介我睇專科吖。」

長頸鹿：「Er……睇咩專科？我哋咪急症專科囉。」

病人：「睇骨科，睇斷骨嗰啲專科呀！」

長頸鹿：「專科就係專科㗎喇，冇分呢啲專科定嗰啲專科，其實呢類嘅骨折兩個專科嘅做法都係同一個標準，治療上唔差太遠……」

病人：「總之我要睇專科啦，你都唔係專科。」

講喇……講喇……病人終於都講出傷人心嘅說話喇。

以前嘅年代，喺急症室工作嘅醫生的確係嚟自其他專科嘅，即係話睇你跌親腳嘅醫生可能係兒科落嚟替更嘅。不過，急症自己已經獨立成為一個專科二十年有多喇，我哋有自己嘅training、自己嘅trainee，醫學院畢業以後一樣要培訓至少六年先可成為專科醫生。

細路仔發高燒……行山俾蛇咬嘅處理……車禍現場嘅救援……全部都係急症專科嘅範疇。

骨折打石膏……甩骹關節復位……急性中風嘅診斷……又係。

呀呀……

仲有急性心臟病發……爆肺插引流管呀……腰痛係生腎石定生蛇呀……又關事。

呀呀……

差啲唔記得仲有心臟停頓嘅急救呀…（唔好意思，嚟緊二百頁都係呢啲……多多包涵）……中毒嘅診斷又係。

又點會唔包括俾雷劈呀……（你就嚟俾雷劈啦仲講…）觸電呀……俾狗咬呀…嗰啲呢。

（夠喇！）

簡單啲講，我哋就好似啤牌入面嘅 Joker咁（早啲講呢句咪好囉，個個都明啦……），百搭嘅。

試想像一下，一個病人，若果忽然間有啲發燒，撞啱又血壓高，手又痺痺地冇咩力，小便又有血，心口又少少痛……

咁究竟邊個問題應該最先處理？邊樣最緊急有潛在致命危險？

睇咩專科？

咪就係睇「嗰啲」專科囉，我嗰科呀！

急！症！專！科！

咦？呢個位唔係起主題曲嘅咩？我鋪咗好耐㗎喎…冇音樂嘅？